torsdag 8. desember 2011

Buoris uddni

Håj!

Buorre le sámegiellaj tjállet. Máhtáv tjállet vajku mav, ja muv klássarádna e sjatta dádjadit.

Galgav tjerrastittjat dálla. Suohtas.

tirsdag 29. november 2011

Njálgge suovas biergojn


Bårriv suovasbiergov rijsaj. Buorre buojdijn baksimijda :p

Uddni lav mannekengan årrum. Anna-Stina Svakko ja Solveig Labba anijga modevuosádusáv, ja måj Sannejn aktan moattes ietjá næjtsoj lijma mannekenga. Riek suohtas lij!

Guokta tjáppa næjtso, Sanne ja Johanna :)

torsdag 17. november 2011

Måj Per Jonasijn



Ráddnam :)


Iehkedis kloahkka gietjan le sámeteahter; byfinnar, lappjävlar och annat pack. Gullam lav ahte le riek buorre ja suohtas teahter, ávvudaláv dallutji!
Dan maŋŋela le tjiektjamhárjjidallam. Gieron Sáme Siebrre li stiellim hárjjidallamijt guokti vahkkuj. Dijstagájt le sisbandy ja duorastagájt le bállotjiektjam.


Hivás!

tirsdag 1. november 2011

Strasbourg


Buoris vas!

Lidjiv loabedam vásse vahko 
tjálet , valla ij lim næhtta Strasbourgan, ja gå Svierigij jåvsådiv dåssju ådiv.
Strasbourga lej ihkeva buorre ræjsso. Mij lip nav ålov dahkam ahte ij vargga dåhkki divna subtsastit. Lijma Eu-Parlamentan iejvvimin 5 eu parlamentarikera Svierigis, gålmås mijás buktin presentasjåvnåv Intergroup for traditional minoritiesaj, iejvvijma guokta ulmutja guhti barggi minoritehtaj birra Europan, ja komissariev Thomas Hammarberg Europaráden. Lip sáhkadam majt sáme nuora Svierigin berustip ja ássjij birra gånnå EU’a soajttá máhtti mijáv viehkedit. Ræjsso lij riek geldulasj ja oahppiv aj ålov. Ássjijt majt giehtojma lij diehttelis giella birra, ja ålov boahttsudoallo gåhtjulvisáj.




Intergroup. Mattias, Elena ja Per Jonas sáhkadin
Tjåhkanibme
Gæhttjamin plenumsálan
Biejav gåvåjt mobil-kameras de oadtjobihtit gæhttjat gåktu dåppe vuojnnuj.




































Bårråmin



Iehkedis måj iednijn lin sjnjissjkomav suohppum. Vuostatjin buoragit manáj, valla maŋŋela, gå  mån galggiv sjnjisskogoahtet iv riekta diede majt dáhpáduváj. Idet hæhttujin joarkket. Mujna l gåjt barggo muhtem vahko ;)

Buorre idja! 



torsdag 20. oktober 2011

Buoris uddni


Håj!

Uddni la låsså skåvllåbiejvve. Mij lip jur matematihkav adnám 2,5 tijma. Lunsjan lij luossa - njálgge.
Dát vahko le buorre læhkám. Rádnaj siegen årrum, ja Sanne lunna oadám, buorre biebbmo, ja iektu lijma saunnimin. Muv ráddna Krasta le dáppe Gierunin, så sån tjuovoj saunitjit muv nuppij rádnaj siegen. Vuogas!
Mánnodagá vuolgáv Strasbourgaj. Mij lip 10 nuora Sáminuorras (sámenuora organisasjåvnnå) guhti vuolggep. Galggap EU-Parlamentaj iejvvitjit muhtem parlamentarikerajs, Europarádes ja Europa-duobbmoståvlås. Doajvov ja jáhkáv riek suohtas ja geldulasj ræjsso sjaddá!
Galgav bloggav tjállet dajt biejvijt nav álu gå máhttelis jus hotellan le internæhtta. Mánnodagás gitta bierjjedagá lip danna.

Dálla la sámegiel’tijmma álggám. Ruvvaláhkáj galgav filmav gæhttjat mij la sámenuoraj psykologalasj vádnasvuoda birra..

Sáhkadibmáj!

tirsdag 11. oktober 2011

Buorre biejvve!

Vuoj, man gássjelis le álu dási tjálet. Iv huomaha at mujna l blogga, ja gå kameraladdarav lav láhppum ij la nav suohtas. Sidáv biedjat ienebuv gåvåjt ja vuosedit majt dagáv, farra gå dåssju tjálet.
Maŋemus rájes lav Divtasvuonan læhkám muhtem biejve, ja dåssju skåvlån årrum. Valla dánna Gierunin muohttegådij vásse duorastagá/bierjedagá ijá. Dálla le ållu bedjat ålggon ja nav hávsske!

Ittjiv jáhke muohta galgaj bissut, valla ájn le vielggat. Juo máhttep sabegijda tjágŋat, ja idet galgav skejttitjit aktan Per Jonasin.

Iehkedis soajttá sjaddá rail-session aj.

Uddni lav viehkam ja rádjam.

tirsdag 27. september 2011

Ådå vahko, ådå máhttelisvuoda



Dijstak,
Mánnodak lij iektu. Guhka biejvve lij, valla skåvlå maŋŋela iejvvijiv ållo oahpesulmutjijt.
Dáppen Gierunin hæhkkat máhtáv gávkalussjat. Jus mujna ij la majna/majnak? bargav ja jus lav aktu sijdan de juolodis nav ruvva sjattav. Gå lav sijdan Snåsan vaj Divtasvuonan máhtáv tjåhkkåhit ålles biejvijt, valla dánna ij dåhkki.
Nå majt uddni?
Galgav bowlitjit aktan rádnaj.
Lijma muhtema bowlimin dá lávvodagá, ja lej riek suohtas! Lidjiv vuojttemin, valla maŋemus rundan Piera baldij muv navti ahte suorgganiv ja ittjiv nagá fokuserit, så ittjiv riekta buvte kjæglojt diejvvat. Ja de maŋemussaj sån vuojtij muv badjel. Sanne Ja Sara lijga aj maŋen. Ja maŋŋela Krasta bådij. Hávsskes iehket!
Jon Isak riŋŋguj iesski. Gatjádij jus galgav fáron Divtasvuodnaj idet. Såj Anders-Kristianin galggaba idet Kárásjjågås vuoddját.
Hálijdav tjuovvot, valla iv riekta diede. Oattjov guosijt ájllegij, så iv rat diede gåktu galgav dahkat..
Ja boahtte vahko ihkap galgav Risten-muohtá (Áhkko-rávkke nuoramus oabbá) hávddádibmáj. Vuojnná dav gåktu sjaddá, valla dåbdåv at la miella áhtjev iejvvit vajku sjaddá dakkár surggos biejvve.
Na nav, galgav lunsjav båråtjit dal. Uddni le liebrrebiffa russjkis-såsajn, ja njálgge le dat!
Galgav hárjjidalátjit biebmo maŋŋela. Buorre J



Gehtja dáv!
Mån lijkkuv dási, ja duo nuppij lávllagijda Áivana ådå mixtape’as.

Johan-Ante vielljabielle ja suv rádna li hip-hop/rap juohkus Áivan. Muv mielas buorre ja suohtas musihkka. Gehtja sijá sijddasijdon www.aivan.org jali Youtube'an


torsdag 15. september 2011

Buorre tjaktja..


Buoris!

Skåvllå l álggám ja tjaktja le boahtám. Buorre l dánna Gierunin, valla vasstes dálkke le galla. Rássjot juohkka biejve, ja navti le læhkám gåjt guokta vahko juo.
 Ålov le dáhpáduvvam dáv maŋemus mánov. Lav duonna dánna gålggåm. Guovddogæjnno lij ihkeva suohtas! Jáhkáv lej buoremus ájllek dán giesen. Karen Monika ja Nils Morten lijga nav tjáhpuga aktan! Ållo ulmutja lidjin, ja buorre sjålle.
Heja maŋŋela vuolggiv Gierunij. SM’an lidjiv Bårjjåsin, ja maŋŋela Ieddne bådij. Måj lijma vádtsemin várijn Abiskuovven, buorre ja hávsskes manno lej. Ja dan maŋŋela manniv Jåhkåmåhkåj tjavtjamárnánij ja Árviesjávrráj Intrigue’av gehtjatjit.
Ja vijmak skåvllå álgij!
Låssåt lej hæhkkat biel’ gietjan badjánit juohkka ideda, valla dálla lev rutijnajda boahtám vas. Oadet binnep ja ájádallat ålles biejvijt..
Lip álggám Matematikk-Dajn, ja dat la nav låsså fáhka. Iv diede jus nagáv dáv kursav dåssju åvtåjn termijnan låhkåt, valla galgav gievrra liehket ja doarrot dajna desik buvtáv!
Iektu dievtij åvtå muv buoremus rádnajs, Sanne, lågenangávtse jage! Lijma stiellim njálga biebmojt ja hávsskudalájma.

De nav. Galgav gæhttjalit nav álu gå máhttelis tjállet dánna bloggan. Gå skåvllå le álggám lev vas tjállemhálov oadtjum.

Sáhkadibmáj!

onsdag 10. august 2011

Hedja ruvvaláhkáj!


Buorre iehket!

Muv oajvve ij riekta máhte vuojŋadit, gå mujna le unnán råhtto.
Dájt maŋemus vahko li ihkeva suohttasa læhkám ja lav nav dudálasj dá giesijn! Buoremus le ahte ij la ájn gærggam. Ihttásjiehkeda måj Thomasijn tjåhkkidin tågaj, ja Gardemoenij mannin, girddin Altaj ja bussaj tjåhkkidin Guovddagæjnoj. Åh gåktu ávvudaláv!! Vuoj vuoj. Karen Monika ja Nils Morten galggaba válldut, ja riek stuor hedja sjaddá. Jáhkáv ållo ulmutja dåhku båhti. Riek hávsske! Fuolkev ja ietjá oahpesulmutjijt iejvvit, ja diedon oassálasstet gå vállduba! Wihoo!
Galgav gåvvit ja vuosedit maŋŋela gåktu lej.
Ævtásj tjállusa maŋŋela lav nuortas årrum. Áhtje lunna, Luovtan, váren, Márkomeannun. Mån iv riekta máhte tjielggit bágoj gåktu le læhkám.
Lav aj Snåsan årrum, Åren ja duonna dánna. Dájt maŋemus biejvijt lin måj iednijn gápptev munji gårrum. Jus riekta galggiv mån goarrot, valla ittjiv háhppida ålov åvdås vuojnijma ahte ij lim gærggám jus mån lidjiv joarkket. Danen lev mån dahkam divna sijddabargojt dagu báhkkum, dumájsnjuhpam, rádjam, málestam j.n. Måj Thomasijn lin aj muorajt bårddåm.

Dálla lev nav nahkárij. Idet vierttiv páhkkit divna mav dárbahav boahtte vahkojda.

Buorre idja!

onsdag 20. juli 2011

Skibás

Uddni iv la vieddje.

Dåbddiv iektu iehkedis ahte lidjiv tjåddågis sjaddamin. Juska de manniv viegatjit ja danen de værrábut sjattaj. Uddni bargon iv la åvvånis vieddje læhkám. Maŋemus tijmajt liddjiv nav vájbbam, ja gå sijddaj vádtsiv dåbddiv juolkij vuolen lij bávtjas..
Lav dåssju oadám, dussjim, málestam ja biktasijt bassam bargo maŋŋela.
Æddnám ja Thomas ja Jon Isak vuolggin nuortas iektu, galggi Riddu Ridduj.
Ieddne javlaj at iv barggat oattjo idet. Danen lev juo barggam maŋemus barggumbiejvev! Giesseloahpe máhttá dal álgget vas :)

Hæhttuv oaddátjit dálla. Ålles rumáj báktjan. Tjåddågis ja vájbbam. Jáhkáv le influensa, valla iv dádjada gåsstå le boahtám!

Oade njálgugijt!

mandag 18. juli 2011

Åhåååj!

Ja buorre giesse!

Malggat dat rájes gå lav dánna tjállám!
Dálla le juo 6 vahko vássám. Ålov lav dahkam ja vuojnnám.                                           Galgav gus subtsastit mij la maŋemus báles dáhpáduvvam?

Na, gæhttjalav..!



Vuostak má lijma Tyrkian! Ihkeva suohtas, ja dáv manov iv gåjt sjatta vajálduhttet moatten jagij. Iejvvijma nåv ållo suohtas ulmutjijt ja bájnov oattjojma rubmahin. Gå dåssju vuolgijma Stockholmaj bilehta dagi oarjás, ejma oattjo mannat åvddål 4 biejve maŋŋela. Så lijma Stockholman daj biejvijt ja dåssju hávsskustalájma danna. Tyrkian lijma åvtå vahkov. Vuolgijma jeep-safarin, Hamam (tyrkisk bad) oattjojma, vuolgijma ietjá stádaj gehtjatjit ja suohtastallat, ja diehttelis lávkojma ja dåssju biejve åvdån vællahijma. Buorre sielluj mannalit duok diek. Munji sjattaj miella mannat værálda birra gehtjatjit ietjá kultuvrajt ja nav, soajttá juo tjaktjaloahpáj?

Buorre ulmutja
Mån ja muv buoremus rádna
Biejav soames gåvåjt Tyrkias.




























Tyrkia maŋŋela bådij áhttje Gierunij ja muv viettjaj. Lidjiv danna nágin biejve ja sæbrriv giellabiese lávvodagá gå Spællávuodnaj vuolgijma. Biejve åvddåla lijma måj Siljajn rijddimin ja sån juolges sjattaj. Vierttijma Bådåddjuj skihppijviessuj vuolgget. Silja kruhkajt oattjoj, valla dálla la vas vádtsegoahtám!


Dan maŋŋela lav dåssju barggam dánna Snåsan Saemien Sijtan, oarjjelsáme museumin. Dat la dudálasj barggo, gånnå åhpav ålov sáme histåvrå birra ja oattjov subtsastit dan birra turistaj. Gå danna bargav oattjov iejvvit ållo ulmutjijt, ja dåbdåv le ájnas ulmutjijda sáme birra åhpadit. Ålos turistajs li læhkám nuorttalin, Nordkappan, Kárásjjågån, Inarin ja nav, valla gå mijá lusi båhti e huoman ålov sámij birra diede. Hæhttup tjiehpep Sápmin sjaddat vuosedit ja informerit sámij birra. Dádjadav ájnas barggo le dat, gå jus ep vuojnnu, ep gávnnu! Buorre barggo le dát aj munji dajnas gå ieŋŋilsgielav sáhkadit hárjjánav, ja aj buorep subtsastit sjattav.
Dálla li dåssju guokta biejve vil desik riekta giesseloabev oattjov. Ávvudaláv degu mánná! Tjåhkkidav idjatågaj nuortas gasskavahkoijá ja Divtasvuodnaj ja Oarjjevuodnaj vuolgáv. Måj Áhtjijn galggin Tjierrekluoktaj ja dassta gábmáj Tjierrekjávrráj ja Gierkkeboadoj vádtset. Galggin guollit gålmå biejve, ja jus láttaga gávnnuji doajvov ládditjit aj vuolggon. Galgav unna vahkutjav Luoktan liehket, dan maŋŋela Márkomeannuj. Galgav kåvrån Vaajmoe sæbrrat. Galggap Workshopajn barggat åvtå biejve, ja biejve maŋŋela galggap lávllot divnajda. Mån gitárav siegen galgav spellat.

Dát sjattaj guhka blogga! Valla navti sjaddá gå ulmusj ij juohkka biejve tjále. Vuoj, dån lidji smidá jus divna låhki ;)



Lijma Snåsa-jávren lávkkomin. Huj galmas tjáhtje!







fredag 3. juni 2011

Ålggårijkajda!

Vuolggep Durkaj-Dalamankusten-Icmeler'ij.

Iv la asstam bloggit, valla soajttá tjálláv nágin bágojt gå ierijt lav.

Lávkkot ja bäjvádagá åvddåla vällahit, de boahtep!!

onsdag 25. mai 2011

Buoris uddni

Håhååj!

Galgav páhkkigoahtet, gå idet manáv Tjiehtelij (Kittelfjällaj) Sáminuorra jahketjoahkkimij. Danna oattjov moadda ietjá sáme nuorajt iejvvit ja oahpástuvvat, ja aj gulldalit guládallamijt ja workshopaj barggat. Doajvov ja jáhkáv dát ájllek huj buorre sjaddá! Ávvudaláv.
Ietján de lav uddni IRF’an læhkám. IRF= Institutet för Rymdfysik.
Danna lip astronautkunskap-ássjen smáv rakehtajt biggim, ja uddni gæhttjalijma duokkár Space Ball’av. Bijav filmav gånnå muv klássaráddna Lucas gæhttjal dav.



Dánna l aj gåvvå munnu Magnusa rakehtas: 
Space-Master la namma, ja mij galggap vuohtjet dav boahtte gasskavahkko (valla mån iv la Gierunin dalloj).


mandag 23. mai 2011

Ihkeva fávrro

Buorre iehket
Tjåhkkåhav sijdan ja usjudaláv..
Usjudaláv duov dáv, valla jur dálla usjudaláv balvaj birra. Gudnabalvajt.
Mån ja munnu ráddnama Josefijnna ja Sanne lip plánim ålggorijkajda mannat. Lip juo girddebilehtajt Stockholmaj rávvim boahtte mánnodagáj. Dassta la plána dåssju mannat åvtåjn girddijn juosik: Spániaj, Tyrkiaj vaj ietjá lándaj gånnå máhttep rusjkudallat!
Soajttá ij huoman sjatta. Islándan la vulkanutbrudd, ja ihkap de e girde háleda. Midja lip riek juolodis jus ep besa mannat. Gåk mij lip ávvudallam dasi! Valla vuojnnet jus bessap..
Åvddåla lav dåssju Danmárkon, Frankrijkan (Álpajn) ja Belgian. Ja diehttelis aj Svierigin, Vuonan ja Suoman årrum.
Ietján ij nav ålov dáhpáduvá. Mujna li ihkeva ållo skåvlåbargo åvddål gå vuolgáv, ja vierttiv ber barggagoahtet..

Áhttjám uddni riŋŋguj ja subtsasti såj Inger-Lisejn libá plánim diek boahtet viettjatjit muv gå skåvllå hæjttá, 10. Biehtsemánnon. Suohtas!

Mujna ælla nav ålo gåvå, valla uddni gávnniv divtav sámegielaj masjijnan majt áhttje l jårggålam lávlos “Wonderful tonight” Eric Claptonis.
Gulldala dáv, ja gæhttjala musihka siegen lávllot; 

Ihkeva fávrro  (Wonderful Tonight)

De bådij vat dat iehket
Ájádallá majt galggá gárvvunit
Muodojsis tjáppudahttá
Rájddá ietjas guhka vuoptajt
Ja de gatját
Iv la så fávrro
Ja javlav, dán iehkedin la ihkeva fávrro

Vuolgijma fæsstaj
Ja gájka munnuj gæhttjin
Dáv fávros næjtsov
Guhti muv siegen la
Ja vat mujsta gatját
Ij la så hávsske
Vásstedav de, diedon hávsskudaláv

Ilmme le munji buorre
Gå tjalmijnit gieresvuodav vuojnáv
Huoman dal ájádaláv
Jus goassak la dádjadam
Man ålov duv æhtsáv

Dal vuolggon de sijddasimme
Iv le ållu vieddje, javlav
Ja de gálggiv  tjoavddagijt
Viehket oaddátjit
Ja de tsamádav
Åvdås tjuovgav jáddiv
Gierugam, dån le ihkeva fávrro.

tirsdag 17. mai 2011

Udnásj biktasa


Iektu lij vuostasj rássjodálkke dánna Gierunin, ja uddni lij vielggat ednamin gå smarediv.
Gå lij nav nievrre dálkke vierttijiv rássjojáhkkaj ja buorre båvsåjda tjágŋat.
Dagáv dagu kjendisbloggára ja biejav gåvåv udnásjbiejve outfit'as, hehe.

http://3.bp.blogspot.com/-xBdCyq8oxDY/TdKGrF_9f4I/AAAAAAAAARU/UNV0u01EgFg/s320/DSC00928.JPG




Muv ådå rássjojáhkka Haglöfs, ja ådå Climate båvsåjt aj Haglöfsas ja stiebila Vikingis ;)














Jur sijddaj boahtám:
http://3.bp.blogspot.com/-yAaBxFuVIso/TdKGxt8XuBI/AAAAAAAAARY/cnUFWVe46DQ/s400/h%25C3%25A5j+006+-+Kopi.JPG
http://3.bp.blogspot.com/-5nwAss5yMlU/TdKG0orclzI/AAAAAAAAARc/LyvY0Or5bzo/s320/h%25C3%25A5j+008.JPG



Ja gå la Vuonarijka álmmukbiejvve de Sara, akta paralellklássan muv bielggetjuvddegadtsaj vuonaslávgáv mállij.

Vuorbbe biejvijn!

Skåvllåbiejvve

Tjåhkkåhav tijman skåvlån. Elektronihkka le dálla ja mij oahppap Transiståvrå birra. Mån vádtsáv teknihkalasj linjav aktan freestyle/sabegijtjerastallam. Vádtsáv nuppát jagev, ja ruvva le dát skåvllåjahke vássám!
Iv mån diede majt sidáv joarkkaskåvlå maŋŋela dahkat, valla niegadiv dán ijá ahte subtsastiv sihtiv polijsan barggat boahtteájge. Na avtav diŋgav gåjt diedáv, ja dat la at sidáv praktihkalasj bargojn barggat. Munji ij lijssi dåssju ståvlån tjåhkkåhit datåvrå åvdån (juska tjåhkkåhav vehi ålov dábálattjat ;)) vaj låhkåt ja tjállet ålles biejvijt. Ulmusj máj dassta vájbbá.

Lunsjaj ávvudaláv. Buoremus dánna Svierigin skåvlåv vádtset le ahte oadtjop málesbiebmov lunsjaj juohkka biejve!.Vuoj man njálga biebmojt oadtjop!
Guláv moaddása e lijkku biebmojt majt oadtju skåvlån. Divna duokkár suohkan-barggamsaje oadtju sæmmilágásj biebmojt. Le dakkár biebbmo majt dåssju lieggisti ja bårrå. Muv skåvllå la priváhtaskåvllå, ja dánna l aj álmmukallaskåvllå (gijtto Marita bágo åvdås). Dánna oadtjop ållu sijddadagádum biebmojt, ja gåjt gåktu mån lav dádjadam le miján ihkeva buorre biebbmo jus ietjá skåvlåjda buohtastahttep.
Uddni la dakkár raggmunk ja buojdde siegen. Raggmunk la beruna ja slåppå segadum ja basedum.

Tijmma le lunsja rádjáj, valla dálla vierttiv dahkamusáj barggat transiståvrå birra!

Hivás 

mandag 16. mai 2011

Buorisboahtem muv ådå bloggaj!


Dát la muv ådå blogga gåsi galgav sámegiellaj tjállet.

Mån lav Lisa, lågenangávtsejagák Snåsas(ja aj Divtasvuonas). Muv áhttje la julevsábme Divtasvuonas ja muv ieddne la oarjjelsábme Åres/Östersundas. Dálla årov Gierunin Svierigin ja dánna joarkkaskåvlåv vádtsáv.

Iv visjá ålov ietjam birra dálla tjállet, valla jus bloggav tjuovo de oattjo muv iellema ja ájádusáj birra låhkåt!

Ulmme dájna bloggajn le ahte galgav hárjjánit ienebuv sámegielav tjállet. Muv mielas dát le suohtas vuohke sámegielajn barggat!

Vuojnnalin /Lisa